DONO ass den Upcycling-Atelier vun der lëtzebuergescher soziokultureller Entreprise Coopérations Wiltz, déi sech fir Kreeslafwirtschaft a berufflech Inklusioun asetzt. Zënter 2018 verwandelt den Atelier gebrauchte Materialien – wéi déi 12.000 m² u Planen, an déi de Pont Adolphe wärend senger Renovéierung agekleet war – an nohalteg Designobjeten. Duerch d’Zesummenaarbecht mat Betriber an Institutioune schenkt DONO dem Plastikoffall en zweet Liewen a bitt gläichzäiteg Leit mat enger Behënnerung d’Méiglechkeet vun enger berufflecher Inklusioun.